Канферэнцыя была арганізавана з нагоды Пастырскага года свецкіх і сіноду біскупаў, прысвечанага сінадальнасці. У цэнтры яе ўвагі былі Новая Евангелізацыя ў кантэксце сінадальнасці і роля свецкіх людзей у Касцёле. У межах мерапрыемства выступілі з дакладамі духоўныя і свецкія асобы. Генеральны вікарый Мінска-Магілёўскай архідыяцэзіі біскуп Юрый
Касабуцкі нагадаў у гаміліі пра Сінод Біскупаў, на якім разглядалася роля свецкіх людзей у апостальскай місіі Касцёла і з нагоды якога праводзілася гэтая канферэнцыя.

Звяртаючыся да навучэнцаў і выпускнікоў Тэалагічнага каледжа імя св. Казіміра ў Гродне, біскуп адзначыў, што, прыйшоўшы ў гэтую навучальную ўстанову, яны “адкрылі сваё пакліканне, якім з’яўляецца і прыход у нейкую супольнасць”, а акрамя таго, іх заахвоціў да гэтага сам Хрыстус: “Ён сказаў: ідзі ў каледж, у цябе ёсць там задачы. Напрыклад, здабыць неабходныя веды, зрабіць крок наперад у духоўным жыцці”. Па словах іерарха, “несці Евангелле на далоні” – гэта “не ведаць, калі настане момант даць сведчанне, і быць заўсёды гатовым да гэтага, бо невядома, калі атрыманыя веды могуць спатрэбіцца”. Біскуп пажадаў навучэнцам тэалагічнага каледжа, каб іх вучоба не толькі перанесла іх саміх на вышэйшы ўзровень, але і дапамагла іншым. Біскуп падкрэсліў, што словы Хрыста: “Вы соль зямлі” былі адрасаваны не толькі Яго вучням-апосталам, але і ўсім людзям. Іерарх назваў здабыццё ведаў дапамогай у тым, “каб соль не згубіла свой смак”, і выказаў пажаданне, каб “усе мы былі соллю зямлі і святлом свету”.

На заканчэнне навуковага сімпозіўма адбылося урачыстае ўручэнне заліковых кніжак студэнтам І курса. Арцыбіскуп Тадэвуш Кандрусевіч уручыў іх 17-ці студэнтам.